VenerablePerru

Con esta receta pues facer un postre perricu y resultón en pocu tiempu, y ensin facer usu d'ingredientes d'orixe animal, 100% vexetarianu.

Pa facer esta tarta d'8 porciones vamos necesitar lo siguiente:

-3 yogures de soya

-1 vasu de llechi vexetal( avena, arroz, almendres, soya,...)

-10-12 galletes

-50g de margarina vexetal

-Mermelada a poder ser de frutes de la viesca

-3 cucharaes de llimón

-2-3 cucharaes d'ocle agar tarazao en cachinos. Esti ye l'ingrediente mas abegosu d'atopar. L'orixe d'esti ocle ta nos mares del sur d'África, les sos propiedaes na cocina ye d'estabilizador y xelificante. Estes propiedaes faen de l'agar un ingrediente perapreciau a la hora de sustituir la xelatina.

La xelatina llograse del coláxenu procedente del texíu coneutivu de puxarra animal fervía n'augua. Esti procesu industrial vien de los güesos, tendones y pelleyu refugau nos mataderos y los pelleyeros.

Estos son los pasos a siguir:

1.Estripar les galletes fasta que queden desmigayaes. Fundir la margarina y axuntala a les migayes con procuru de que queden bien entemecies. Esta masa va ser la base de la tarta, asina que tien de quedar homoxenea nel molde.

2.Ferver la llechi y disolver l'agar. Solmenar fasta que l'agar entame a esfacese y, darreu, entemecer los yogures y el xugu de llimón, fasta que se faiga una crema. Echa-y sobre la base de galletes y metelo na nevera.

3.A la media hora, cuando te cuayao, untar la mermelada per enriba cubriendola entera. Metela otra vegada na nevera. Servir mui fría.

Escritor, historiador y ensayista griegu(46-120 d.c.) dixo:

"Yá qu'aporfiais que tais diseñaos pola naturaleza p'alimentavos con carnes, mata-y vosotros mesmos tou aquello que queráis comer. Pero faceilo coles vueses manes, ensin ayuda de cuchiellos, palos nin brueses de nengún tipu".

Güei voi engolar una collaboración d'un collaciu asturianu y veganu: Pablu Alonso. Ye un rellatu cómicu y realmente tráxicu.

CARTES AL DIREUTOR.

HOLA, SOI UNA DE LES PITES DE GRAU:

El determín p'escribivos nun ye otru que'l d'amosavos la penosa situación na que malcuentro. Presentome, pertecnezco pol mio xéneru a la familia de les phasianidaes, nel orden de les galliformes y el mio nome binomial ye'l de "gallus gallus" anque, si nun vos importa podeis nomame Carmela, que ye como se me conoz ente les mios asemeyaes.

Una vegada feches les presentaciones paso a cuntavos la mio triste hestoria. Yo vivo (o malvivo) nuna xaula d'unos 30x40 cm, ensin lluz ñatural ni salida al campu, pásome la vida nuna navona industrial rodiada d'unes 13.000 pites que tan na mesma situación que yo. Ya de mui piquiñina, alcuerdome qu'arramplaronme col picu con una maquinona del diañu (perdón pola espresión), que lo que me fixo foi amburame'l picu fasta dexame ensin él, cola sida de qu'asina nun mos daba por engarranos ente nós y pa que'l dueñu la empresa nun perdiera parte de la so materia prima. La cuestión ye que, anque les mios compañeres nun lo sepian yo sé que lo que quieren de nós son los nuesos güevos, sé que-y los venden a la xente pa comelos, pa pintalos o pa tirailos a uno de esos cantantes mediáticos, ya sabeis...., d'esos que salen na tele d'agora, nesos shows nos que depues de facete endengazar 35 quilos llánzante a la güeta d'oru y fama . Otra cosuca que me prestaría denunciar y asoleyar ye la poca consideración pa col nuesu descansu, el casu ye, que mos prenden les lluces de la nave unes tres vegaes al dia, yá sabeis, pa tracamundanos y asina ser mas productives, por que pal neófitu, les pites ponemos güevos namas de dia, y lo unico que-yos pruye a esta xente que mos tien equí zarraos, son los nuesos güevos( que nun son d'oru pero p'ellos como si los fueran). Lo que me prestaría mas a mi nel nundu ye qu'esto finara yá, prefiero morrer enantes que dar un güevu mas, prestaríame ser llibre, o polo menos ser como esa pita grandona que ta tol dia escorriendo a un homón mas anchu qu'altu, por cuentes de nun se que de la llingua. Pa finar estes lletres prestaríame facer un llamáu a la revuelta, a toles pites que me llean, que nun echen ni un güevu mas, y a la xente que los merca y que mira p'otru llau y solo ve una semeya mía o d'una de nós, nel campu felices y contentes xintando piensu del bono, que sepian que nun ye asina y que'l duelgu, la tristura y la soledá nun ye padremuñu únicu de los homes y muyeres, tamién ta nos amás animales....

GRACIES.

CARMELA.

Llamame muncho l'atención la repercusión de la noticia de la condena d'un vecín de Teyeo(L.lena) que venceyó a la so perra a la bola del remolque del so vehículu y arrastrola durante 2 quilómetros. Lleo comentarios de xente indignadisimo, porqu'abulten-yos que los 6 meses de carcel, sustituios por 1080 euros, ye una risión en compararanza col pasamentu de la perra n'esos 2000 metros mentes diba abrasandose-y el peyeyu. La xente dicía de garrar a L.P.G. y face-y lo mesmo que a la perra, otros taben por dir a Teyeo y solmena-y una cuera. Hai mustres de duelgu a esgaya.
La verdá ye que prestame saber que la xente nun ye indiferente ante estes aiciones. Pero lo que más me llama l'atención ye que categoricen la so indignación, unos merecenla y otros non. Nun entiendo un res.
¿Por qué'l solmena-y a un perru ye ser un xabaz aborrecible y el que come una hamburguesa non? Anque tous sabemos les condiciones de vida y muerte de la vaca, porqu'esto nun mos afeuta. ¿Qué mos fixeron na tiesta pa nun sentir noxu al ver los cientos de calabres escuartizaos qu'hai nuna carniceria?o ¿el pexe que mos llante enriba'l platu?

Esta ye la perrina

Según teo lleio, va desendolcase una campaña pa que'l consumidor asturianu conozca "la producción de la xata ecolóxica asturiana". La producción de carne(lo que ensin l'eufemismu vien a ser: sofitar económicamente la masacre d'animales non humanos) nun pue ser ecolóxica. El consumu de carne ye ineficiente col usu de la tierra y ye'l mayor causante de deforestación, tamién ye ineficiente col consumu d'augua y contribuye al efeutu invernaderu. Cola etiqueta "carne ecolóxica" tratase de xustificar lo que yá, la xente, ta entamando a atalantar que la carne ye insostenible col mediu ambiente, cola salú y nun carretar con muertes innecesaries

Efeutu invernaderu
Un informe de la Organización de les Naciones Xunies pa l'Agricultura y l'Alimentación(FAO), diz:
"El sector ganaderu xenera mas gases d'efeutu invernaderu-18%, midios en so equivalente en CO2- que'l sector del tresporte.Tamién ye una de les principales causes de degradacion del suelu y los recursos hídricos"
La produccion intensiva de carne  contamina agues, xenera residuos químicos, gases peligrosos procedentes del cuchu(oxido nitoso) y del sistema dixestivu(metanu, que contamina 23 vegaes más que'l CO2). Cada vaca produz 90 quilos de metanu al añu, lo qu'equival a la contaminación que supón amburar 120 llitros de gasolina.
Un exemplu de lo dañino de la cría d'animales ensin xacíu ye'l casu de Nueva Zelanda, que con una poblacion de 4 millones tien 50 millones de rumiantes, que xeneren el 40% de les sos emisiones de CO2. Según la FAO, producir 1 quilu de xata nun solo requier 15 vegaes más d'augua que de vexetales( 15 m3 frente a 1m3), sinon que produz 12Kg de CO2, lo equivalente a viaxar en coche durante 200 quilometros.

Tierra y deforestación
El consumu de carne al nivel mundial nos caberos 50 años medra ensin torga, el problema agrabase col fechu de que los paises en desendolcu quieren algamar el mesmu nivel de vida d'occidente y ente ello el consumu de carne, qu'enantes nun yera vezu na so cultura. En EEXX el 90% de la cosecha de cereales(maiz, centenu, avena y soya), destinase a la fabricación de piensu.
Semando soya n'un prau de 100m2 tendriemos 5 quilos de proteines, que puen cubrir les necesidaes de 70 persones nun dii, pero si usamos el prau p'alimentar una vaca conseguiriemos 1/2 quilu de carne, lo que valdría p'alimentar a 3/4 de persona al dii.
Pa conseguir les 2500 caloríes( persona y dii encamentables), basándose nuna dieta carnivora  necesitaries  1,5 hectáries y basánose nuna dieta de trigu valdría con 1/8 de terrenu. Y con 1/2 hectárea semando arroz y llegumbres pue dar de comer a 6 persones.

Augua
La güerta d'un vexetarianu necesitaría 1300 llitros diarios p'alimentalu. Nel casu la dieta media occidental necesita 10000 llitros diarios.

Y nel casu de la pesca seria necesario aumentar 6 vegaes la producción mundial p'algamar les necesidaes mundiales, dalgo abegoso ya que la mayoria de los grandes caladeros tan esgotaos y la acuicultura(les picifactories), que ye 1/3 la produccion mundial, nun ye la solución.

Ye encamentable sofitar el fomentu de l'agricultura ecolóxica, pero non a costa les vides de otros. Dende'l comedor de to casa pues salvar munches vides, amas de ser sostenible col planeta y meyorar la too salú.

Llebaven unos dies a la gueta d'una osa pel Val d'Aran que ya atoparon. Esta osa, según cuenta'l cazador feríu, que taba tan tranquilamente tratando de matar unos xabalís, atacolu, adento-y una pierna y esgatuño-y un brazu. Al cayer disparose-y la escopeta y la osa nomada Hvala, esnaló del llugar. En 1996 foi reintroduciu l'osu nel Pirineos, de magar nun se conoz denguna agresión, y muncho menos qu'un osu matara a daquién. Pero ya tan falando de caciar los 7 osos qu'anden pel llugar y busca-yos otru sitiu onde puean tar en condiciones de semillibertá y nun pongan en peligru la vida de les persones.
Rápido se-yos noten los intereses: lo primero son los cazadores que dexen bonos euros, a los qu'hai que decora-yos el monte y dempués el restu la naturaleza.
La cabera osa pirenaica, Cannelle, foi asesinada por un cazador frances nel 2004. Esti matola cuando diba col so esbardu, por atacar a un de sos perros. El cazador que finó con una especie, Rene Marqueze, foi absueltu nel xuiciu.
Como ye vezu, el peligru ye l'home non el restu d'animales.
N'Asturies la situación de l'osu nun ye tan abegosa, nun hai tanta presión turística nos montes. El llobu ye otru tema, siempre ta cuestionáu, pero como nada más molesta a 4 ganaeros, nun supon incordiu, inda.

Güei va d'osos

L'osu polar ye'l mayor de predador terrestre. En condiciones naturales alimentase de carne, ye lo qu'hai nel so hábitat. Pero'l casu de Tiguac ye diferente, vive apresáu nel Parque Acuáticu de Quebec.
Fasta'l mayor depredador presten-y más los vexetales

El veganismu pasa per un replantegamientu de ciertos paradigmes, per cuestionase verdaes absolutes coles que mos configuren al aportar a esti mundiu. De nenos, cuando tamos por deprender el funcionamientu la sociedá na que mos tocó ñacer, xurden entrugues que son afogaes rapidamente. Munches d'este entrugues tan relacionaes cola alimentación, ye normal, ye una aición perimportante que repetimos unes cuantes vegaes al dii. El nenu que quier saber l'orixe d'esi picadiellu que tien enriba'l platu, ye vezu retrucar con un: ¡abocana y comi! o con hestories difuses que nun convencen a naide, y que ye l'entamu de la aceutación del esín xaciu y el conformismu. Cuesta atalantar comu algamemos esti estau de ceguera al duelgu ayenu.
Aceutando que'l ser humanu ye omnivoru, anque les sos caracteristiques fisiolóxiques son más propies d'un hervivoru( intestin perllargu, dentame con molares planos, caxada movil, ausencia de garfes,...), esto quier dicir que pue alimentase de vexetales y carnes. Poro, l'alimentación total de vexetales ye posible y encamentable.
"El ser humanu siempre s'alimento con carne", suel llantar ensin pensar quien come carne. Esto amás de nun ser verdá, nun xustifica un res. Hai cultures milenaries q nun tenin el consumu animales muertos dientro'l so réximen,comu ye'l casu de los hindus, xainitas,... y mesmamente dientru del cristianismu hai abondos antecedentes, como los cátaros. (El veganismu nun tien que ver con nenguna corriente relixiosa, cenciellamente cito cultures al rodiu de relixiones). Y la siguiente cuestion a l'hora de retrucar ye, que dalgo fixerase comu vezu nun quier dicir que seya xustificao, siempre fixeronse guerres, l'home maltrataba a la muyer, el blancu esclaviza al prietu, l'ablación la clica...

Too xurde del deséu de dominiu, de sometimientu, del ensin sentiu. El sexismu, el racismu y el especismu tienen el mesmu raigañu.

Quicias, n'Asturies, abultamos qu'eso de la ganadería intensiva ye d'otros llares, apaeznos la imaxe de la vaquina paciendo nun prau rellumante de verdor, na que nada más falta que la vaca de-y les gracies al ganaderu por portiala al mataderu. L'autu engañu, la llercia a conocer la verdá y dase cuenta del error.
Les vaques, les pites,... viven en condiciones de pasamentu, son hormonaes, alimentaes cola puxarra de la puxarra,  ensín saber lo que ye mirar ensin que los sos güeyos ten torgaos per una muria o un zarru. Nun te dexes abollecer pola etiqueta de "ganaderia ecolóxica", estremase nada más en tener unos metros más nel truyu nel que van esistir y morrer, pol fechu de pertenecer a otra especie.
Nun se pretende la meyora de les condiciones de vida, sinon l'abolición de esta mena d'esterminiu. Como nun yera d'enternder el bienestarismu na dómina de l'esclavismu en Norteamérica, que se pretendiere tratar meyor a los prietos( dexar de da-yos cibiellaes), sinon l'abolicionismu, que foren llibres.
Lo mesmo pasa colos animales non humanos, sienten, tienen intereses propios, quieren desendolcasese como individuos que son.
La decision ye tuya. Comu nel mitu la caverna de Platón( que yera vexetarianu, por cierto), pues siguir atáu na escuridá o salir fuera y enfrentate cola verdá.

Piensa si ye necesario. Failo por ellos y elles.

Nesta sección voi engolar recetes cencielles y riques, col envís de demostrar que nun mos alimentamos de pación nin comemos ensalaes a toes hores.
El falafel va ser la primera receta.
Cuando estames col vexetarianismu una zuna ye siguir comiendo lo mesmo a lo que tabes avezau, pero quitando-y les carnes, pescaos, productos llacteos y demás. Equí ye cuando xurden los problemes, cuando puen apaecer les anemies y cuando los menos concienciaos dexen el vexetarianismu aldericando que nun-yos setaba bien.
Naide dixo que ser vexetarianu fuere fácil y muncho menos el veganismu, hai qu'algamar unos conocencia de nutrición enantes d'aniciar el camín. Apaecen entos alimentos que, o nin sabies qu' esistíen o relacionabes con xente "snob". Seitán, tofu, tempe, amaranto, quinoa,... Tienen unes propiedaes perinteresantes.
Como dixi, voi entamar col falafel, que con ingredientes comunes, dando-y otru enfoque, pues facer un platu prestosu.
Ya va tiempu que´l falafel, de la man de restaurantes llibaneses, indus, turcos,..., ufierten esti platu nel so menú.
Pa los que nun lu conozan... El faláfel o falafel (árabe: فلافل falāfil; hebreu: פלאפל faláfel) ye una croqueta de garbanzos o fabes que s'orixinó en dalgún llugar del subcontinente indiu.
La nuesa receta va ser de fabes, qu'anque ye la versión menos estendia,  por tener bona materia prima ye más encamentable. Estos son los INGREDIENTES que vamos utilizar:
-2 taces de fabes
-1 cebolla
-2 cuyaraes de perexíl fresco picao
-1/2 taza d'augua( podemos aprovechar l'augua qu'usemos pa dexar a remoyu les fabes)
-2 dientes d'ayu
-2 cuyaraes de comín
-1 cuyara de culantru fresco picao
-1 cuyara de farina
-sal a gustu
-aceite
Siempre pues da-y el to toque personal a la receta, y si nun yes  atopar el culantru, o nun tienes perexíl n'esi momentu pue prescincise o echa-y otra cosa que te preste, pimienta, pimentón, apiu o formietu(si quies que queden mas esponxoses), son ingredientes que van perbien.

PREPARACIÓN:
1. Dexar a remoyu les fabes la nuechi anterior.
2. Dexa l'augua necesario y pasar pela batidora les fabes y el restu d'ingredientes fasta que quede una masa rugosa.
3. Nesti pasu encamientase dexar reposar la masa 1 hora, pero equí dependi de la to fame
4. Fae bolines o estripales en forma redondeles según te pete( a mi resultame meyor pa freir en forma redondeles) y freiles con aceite cubriendoles fasta la mitá polo menos.

Pa que seya lo mas nutritivo posible y consiguir tolos aminoácidos esenciales que formen les proteines completes, ye encamentable amestalo con cereales integrales( pan integral, pan de pita) y/o frutos secos(piñones). Y si entames con una ensalada fresca vas tener una comida persaludable.

Esti ye'l primer exemplu de que te pues alimentar ensín ser complice de la esplotación, tortura y muerte d'animales que, como tu, querien vivir.

Veganismu
¿Qué ye eso?

Esta idea xurdió n'Inglaterra de 1944, cuado dos vexetarianos puros(Elsie Shrigley y Donald Watson) naguaben por dixebrase d'aquellos que nomabense vexetarianos y comien güevos, llechi o pexes."Vegan"(veganu/a), ye una evolucion de  la pallabra "veg-etari-an" (vexetarianu). L'1 de payares d'esi mesmu añu fundaron la Vegan Society.

El veganismu básase nel respetu a la vida animal, ya seya humana o non. Esti respetu vien sofitau, sobre too, n'argumentos éticos, ecolóxicos y de salú.
Col veganismu xurde, tamién, el refugu al especismu, a la visión antropocéntrica na que too ta sometío al poder humanu.
Na defensa los derechos animales el veganu/a toma les siguientes midies:
-Alimentación: ye 100% vexetariana, quier dicir, que nun usen dengún productu d'orixe animal. Ya seyan direutos como la carne o'l pescau, o subproductos como'l quesu, los güevos, el miel,...
-Vistimenta: les pieles, el cueru, la llana, la seda,... contibuyen a la esplotación animal.
-Testar n 'animales: escluyen los productos probaos n'animales
-Ociu: nun van a espeutáculos nos qu'intervengan animales non humanos, ya seyan zooloxicos, circos, acuarios,...
-Nin denguna otra acticidá que puea dir escontra los sos intereses.

Les razones son abondes, pero'l camín a la coherencia ye unu. Nun ye necesario siguir valiendose del pasamentu y muerte d'otros col xeitu d'apanguar los deseos egoistes propios.

¡FAETE VEGANU/A!

Y como dixo'l ganador del Nobel y Oscar, George Bernard Shaw(1856-1950), énte la entruga de por qué yera vexetarianu:
¡Home,ho! Esa bota ye d'otra pierna.¿Por qué deberies de pedime cuentes por comer decentemente?. Si cebareme con calabres xamusquiaos d'animales, mui bien podríes entrugame por qué lo facía.The Vegetarian, 15 de Enero de 1898.