VenerablePerru

Teo d'insistir no evidente.

El mundiu, y lo que vive dientru d'el, nun ye una posesión del ser humanu. A min esto abultame de lo mas nidio, pero nun tola xente piensa asina, sobre too si entames a afondar en dellos temes.

Dende una posición evolucionista somos una especie animal qu'aportó a esti planeta azul va cuatro dies en comparanza con otres especies. L'homo sapiens lleva unos 100.000 años enredando pel planeta. El caballu 2 millones y la domesticación d'esti foi va unos 5.000 años.

Esti homínidu altaneru nun se da cuenta que'l restu de los animales viven ensin necesidá nenguna d'él. L'autoproclamación de ser superior pola so mayor capacidá inteleutual nun xustifica'l sometimientu y esclavitú de los “inferiores”. La verdadera intelixencia demuestrase dando soluciones coherentes a les torgues, col saber optimizar los recursos esistentes, col procuru pa col feble, col nun egoista,... Y yo nun veo nada d'esto

Con esto prestariame algamar una visión mas amplia de lo que ye, y nun somos a atalantar.

Se qu'a la mayoria de la xente que un caballu caiga esfallecíu al suelu durante la cabalgata de los reyes magos ye dalgo aneudótico, circunstancial, cuasi gracioso. Pero si tienes desendolcada la capacidá d'empatía y pues ponete nel llugar d'esi caballu, nun sería dalgo tan ensin importancia. Nun hai mas que mira-yos a los güeyos pa atalantar el pasamentu que tan sufriendo.

Quien ve aneudótico esti esfallecimientu, teo de sospechar que tamién lo vería asina col esfallecimientu d'un prietu faciendo trabayos fuerciaos na dómina de l'América esclavista.

El dolor ye'l mesmu independientemente del color, xeneru o la especie

24.870€ d'alquiler de 18 caballos de tiru y 17.227€ a la escuela d'equitación La Segoviana polos 35 caballos ferraos en goma. 42.097 euros.

Nun me paez razonable.

Fina'l 08 y entama'l 09, los dos cola solombra de la crisis.

El positivismu mas que una actitú ye una necesidá, una dirección pa la sobrevivencia.

La pallabra crisis bien del griegu κρίσις (krisis) y esti del verbu krinein, que significa “separar” o “decidir”

En chinu hai un dualismu perinteresante, l'ideograma ta formáu por dos con estremáu significáu: perdida y oportunidá. 危机 (Crisis)

Ye un momentu pa replantegate coses, pa desprendete de lo innecesario, de desendolcase, de correxir el rumbu. Cayer na llercia coleutiva, l'inmovilismu ye una mena de menguar. Asina veolo.

Tolos 1 de xineru son especiales pa mi. Un 1/1/01 decidime a dar un de los pasos mas importantes de mio vida: faceme vexetarianu. Nun teo nidiu porque, abultame que yera una necesidá, dalgo que medra dientru ti inconscientemente, fasta que un díi enllenate y desvordate. De pequeñu, como cuasi tolos neños, tevi dellos alcontronazos col vezu, meyor dicho cola zuna, de comer carne.

De mui nenu, alcuerdome que mio ma mercome dos pitinos nun mercáu, un dellos espoxigó a pesar de toles perreries que fixe-y. Medro tantu qu'en ca ya nun podia tar. Mi ma dixome de llevalu al pueblu mio güela onde podía tar na so güerta. De tantu en tantu diba a velu. Tiempu dempues, diome por entrugar pol pitu, porque sabía que dalgo pasaba conel. Mio pa sorriome y encamentome que mirare pal platu. Enfademe fonderamente, esi díi nun xinté.

Tamién, de guah.in, diba a andar en bicicleta colos coyacios a un camín a la fastera del Nalón, pasabemos delantre un pequeñu mataderu, que valdría pa previr a la carnicería del pueblu. La puerte siempre taba abierta y atalantaba a ver xates engolaes de ganchos nel techu. Vi toles fases de la escuartizacion.

Les retrugues de mios pas al fechu nunca nun me convencieron del too. Y nun foi fasta'l 2001, aprovechandome de la crisis de les vaques lloques, que dexé la carne. Tenía la sida perfeuta. El pescau, foi xustamente 2 años dempués, tamién, con utru momentu de crisis: el Prestige

Y, finalmente, el veganismu(100% vexetarianu) el 1/1/06.

L'asturianu y el veganismu, son les mios siendes d'incompresión coles que teo fonderes aldariques, pero naide nun ye a apartame delles, la xusticia y la coherencia guienme.

Uviéu ta tremao de cartelos del circu Colisio. El circu Coliseo nun ye un d'esos circos modernos qu'esperimenten con les espresiones corporales, qu'escenifiquen llugares d'ensueñu, nin traten de dirun pasín mas allá colos sos trucos, non. Ye un circu de vieya escuela que tien como sofitu principal a los animales. Nun hai mas que lleer el cartelu: “Circu Coliseo. El circo mas moderno de Espana. Presenta: tigres de bengala, osos-pardo, perros rotweiler, elefante africano y por primera vez un leone marino en la pista de un circo”

El vienres pasau diba caleyando per Uviéu cuando vi'l esperpénticu coche del circu allegandose a mi pela carretera. Punxi la mala cara qu'avezo a poner n'estos casos(engurriando'l ceñu y fuerciando los güeyos tolo que pudi esperando que saliere un rayu llaser destructor encontra ellos). Agüeyé dientru'l coche, y la mio sospresa foi ver que nel asientu d'atrás, ente dos paisanos, un osu que nun dexaba de movese. Costome creelo. _Esto ye seguridá vial: carretar un osu, que la verdá, nun m'abultó que llevara dengún cinchu _Dixeme. Indignáu, siguí'l mio camín.

Taba lloviendo, poro, dionos por metenos nel centru comercial de Los Praos. Al llau les xubidories mecániques había abonda xente al rodiu de daqué que nun atalantábemos a ver. Averemonos. Enrriba d'un tayuelu, con un gorru de Papá Noel y con un bozal, taba un esbardu. La estaya nun podía resultame mas llamentable y sentí una fonda tristura porque la xente viere como normal esa situación y sacare semeyes con esa gayola. El domador tiraba de la cuerda que lu xunía al bozal del esbardu, porque esti nun paraba quietu. Uniformaos d'azul, intranquilos, amosando un xestu foscu na cara, una muyer y dos homes facien d'escoltes y daben descuentos d'entraes a los nenos.

Pensé que esti tipu d'espeutáculos yeren d'otru tiempu, qu'anguañu a la xente ya nun-y interesa ver un tigre pasar por un aru nin un elefante, desnaturalizau, faciendo postures rares. Prestariame pensar que la xente ye cosciente de les condiciones nes que viven estos animales: tresportaos de ciudá en ciudá, torgaos nuna minima xaula cuasi too'l tiempu, obligaos a facer coses que nunca nun fadríen,...

Anque tengan tolos cuidaos veterinarios y nuticionales( que nun los van tener nin por asomu, yá que son circos d'escasu presupuestu), el tigre nun va dexar de vivir la so pesadiella na xaula y l'elefante va tar perllonxe de la so cáldia Sabana onde caminaba tolos diis decenes de quilómetros.

Estos circos ca vegada atopen menos lluagares onte espurrir les carpes, l'usu d'animales n'espeutáculos ta restrinxío o prohibío en paises como Finlandia, Suiza, Suecia, Dinamarca, India,...estaos d'EEXX(California, Florida,...), de Grecia, Brasil, Australia,...

En Cataluña tan prohibios los circos con animales xabaces, esto nada mas que val pa evitar el comerciu illegal, yá que si nacieron en cautividá tamos na mesma.

Siguimos mirando dende la distancia un cachín mas, diba a colar gachu y resináu, cuando un de los mios coyacios llanto un repentín glayíu: ¡mantrataores! Díxolo 3 vegaes cauna con mas fuercia. Utru llamolos esclavistes. Enfocaronnos y baxaron los güeyos nun actu maquinal como si nun fuere la primera vegada que tan n'esa situación. La xente mironos con una cara que nun supi descifrar si yera diciendo: ¿quienes son ellos alloriaos? o tienen razon.

Pat Derby que fuere entrenador d'animales en Hollywood, escribió un llibru, con arrepentimientu, denunciando les condiciones de crueldá y sufrimientu de los animales que trabayaben tanto nel cine, televisión y publicidá, dixo: “dempués de 25 años observando y documentando circos, se que nun hai entrenadores d'animales con bondá”.

Un exemplu: na película Babe(el gochín bragáu), sacrificaron a 48 gochinos, porque engurdiábenlos tan rápido qu'enseguida ya nun valíen pa salir en pantalla. Tráxica final.

Asina, al debalu, podría dicir qu'hai 6 castres de consumidores de carne:

1.Arguyosu: esti ye'l que t'agüeya penriba'l costazu, espeyando una sorrisa arcaico nos llabios. Conocedor d'una verdá inamovible. Nunca nun se pue falar fonderamente yá que considera toa alternativa a la so forma d'atalantar la vida cosa de guah.es o modes pasaxeres.

2.Espreocupáu: la vida son 4 díis y hai qu'esfrutalos. Básase nun edonismu egoista, nun quier enguedeyar la tiesta en problemes abegosos. Vive na superficie, refuga lo que nun-y preste. Abultame qu'esti tipu, enxamas s'enfrentaria a nenguna inxusticia que lu incomodare. Lo másimo que fadría seria pagar una cuota mensual a una ONG pa sentise bien.

3.Resináu: atalanta'l problema, lo inxusto, comparti'l el dolor, pero “les coses son asina, nun se pue facer nada”

4.Inorante: ye como si viviere nuna burbuxa inpermeable, plasma al conocer como funcionen les coses.

5.Autoesculpáu: “yo cuasi nun como carne”, estos dan un pasu p'atras, creen tar fuera del fechu. Pero nun ye asina, la so etica ximiélgase y ta a piques d'esfacese. Yo cuasi nun soi racista, yo cuasi nun-y pego a la mio muyer,... ¿?

6.Cínicu: ye un argullosu con demagoxa. Fala ensin propiedá y argumentos probes. Lo mas facil ye que llante hipocritamente: ¿Y les plantes que ye que nun sufren, ho?, ¡llistu! Nun-y importen un res si sufren o dexen de sufrir les plantes, nada mas ye una forma d'atopar xustificacion pa siguir cola so autocomplacencia.

Ente esti duelgu poles plantes teo de dicir lo siguiente:

1. Les plantes nun tienen sistema nerviosu, poro nun esperimenten les sensaciones, sienten pero carecen muérganos que pudieren rexistrar lo que-y sucede. Se qu'esti argumentu pue dar llugar a alderique, sobre too dende la seudociencia.

2. El menor dañu posible. Si comes carne de xata vas comer al animal y 7-10 vegaes mas de vexetales que necesita la xata p'alimentase. La proporción ye: carne 8-11:1, vexetales 1:1

3. El ganáu consume'l 70% de la producción agrícola. Esto esfae l'argumentu col qu'el consumidor arguyosu pretendi acusar a los vexetarianos de ser los mayores causantes de desertificación del planeta, ye xustamente lo estremao

4. Dalgunes plantes necesiten ser comies pa poder reproducise. Como les flores necesiten de los inseutos pa esparcer el so polen. Si toes les frutes cayeren embaxo l'arbol nun algamarien a reproducise, vienios bien que daquién coma la pieza y dexe'l moxicu nun sitiu afayadizu onde poder medrar.

5. Meyor alimentase de coses vives que non muertes. Unallechuga, abondo dempués de ser coyia, inda ta viva, nun pasa lo mesmo con un cachu carne, xustu dempues de la muerte de l'animal entama l'empodrecimientu.

6. ¿Nun sería una crueldá escomanada qu'esistiere un ser sintiente que nun pudiere fuyir del so asesín?

Mientres los homes masacren a los animales, mataranse ente ellos. Aquel que seme la semiente la llaceria y l'asesinatu nun pue pañar gociu y amor.

Pitágoras de Samos. Filósofu y matemáticu griegu, amás de vexetarianu.

Güei, taba agüeyado una noticia que falaba de la visita del ministu de xustizia al cotu de Monte Cayón y la so afición a la caza y, de sópitu, entame a sentir la mas fondera de les marxinalidaes: la marxinalidá dientru la marxinalidá. Escribir n'asturianu ye dalgo pequeñino que me fae sertir que voi nun sentiu estremau a la mayoria la xente, pero prestame pensar qu'esta minoría ta consolidada y medra puquiñín a puquiñín. Per utru llau ser vexetarianu estrictu(veganu) ye dalgo muncho mas inapreciable, cuasi invisible.

Si les estadístiques falen que n'Alemaña son veganos el 0'1% de muyeres y el 0'05% los homes, nel Reinu Xuníu ente'l 0,25% y 0,4%, n'EEXX el 0,2% y 1,3% y en Suecia ente'l 0,27% y 1'6%. Abultame que, siendo estos paises muncho mas pregresistes, na nuesa Asturies los veganos y veganes nun algamaremos a ser nin 10 ente 1,077 millones que somos.

Nun toi empobinando too esto p'aportar a la conclusión de lo únicu y especial que soi, non, nun me siento asina, pero pienso que tengo una especial “habilidá” pa escoyer el bandu de los que van al revés de les tendencies. Anque la mayoria de los qu'escribimos blogues n'asturianu somos unos marxinales, ca un tien la so hestoria, la so llucha, el so ideal.

Aportáu esti puntu, siempre xurdeme una cita de Margaret Mead( una de les muyeres mas influyentes nel mundiu de l'antropoloxía), y diz asina:

Nun hai dulda que un garrapiellu de ciudadanos pensantes y esmolecios puen camudar el mundiu. Ciertamente, ye lo único que lo fixo.

Agora, yá mas motiváu tres la frase, voi siguir col llabor d'esti blogue:

Mariano Fernandez Bermejo, ministru de xusticia, dixo que presto-y muncho la caceria nel cotu piloñes. El grupu de Bermejo mató 4 xabalies y 11 animales más, un de los xabalies foi asesinau pol propiu ministru. XUSTICIA ye una pallabra escomanada, cola que s'enllena la boca de baratu, pero ¿como pue facese xusticia matando a un animal que l'únicu delitu que foi pertenecer a otra especie? ¿Cómo pue ser xustu quien mata por caprichu cual sicópata?

La noticia tamien falaba de que'l xuez Baltazar Garzon tamién va pol cotu piloñes a robar vides a inocentes.

Esta ye la entruga qu'un vexetarianu va sentir milenta vegáes a lo llargo so vida. Dase un cuenta del desconocimiento tan escomanau que tien la xente sobre nutrición, y nun ye que yo seya un espertu nel asuntu, pero si ye verda, que si quies nun tener problemes nesti camín que ye'l vexetarianismu y el veganismu, has de tomalo en serio y lleer sobre'l tema.

La mayoría la xente nun sabe mas allá de les 4 cosiquines que deprendió na escuela y les imáxenes que queden na alcordanza de los globulos roxos acarretando osíxenu qu'apaecien en “Yerase una vegá la vida”

Les proteines son macromolécules ensenciales pa la vida, una de les principales funciones ye la de formación de texidos(musculos, güesos, celules,...). Al mesmu tiempu les proteines tan formaes por aminoácidos que puen estayase n'esenciales(AE) y non esenciales. Los non esenciales son los que sintetiza'l propiu cuerpu y los AE son los que necesiten ser inxerios al traviés de la dieta. Equí entamamos a falar de proteines completes o d'alta calidá y incompletes. Les completes son les que tienen los 8 AE, como ye'l casu de: carne, güevos y llácteos; tamién les hai vexetales como la soya, espelta y quinoa. Lo bono les proteines incompletes ye que puen completase combinandoles.

Por exemplu, a les llenteyes falta-yos el amninoácidu nomáu ”metionina” y al arroz falta-y “lisina”, poro, si amestamoslos tenemos proteines d'alta calidá.

La fórmula ye: LLEGUMES+CEREALES=PROTEINES COMPLETES.

Otres posibilidaes puen ser: fabes y pan, garbanzos y frutos secos, ensalada d'arroz y pistachos,...

De fechu, nun resulta especialmente abegoso algamar les necesidaes encamentables de proteines ensin falta de complementos nin ingredientes “raros”.

La dieta vexetariana y vegana son totalmente viables, fasta n'actividaes que requieren una gran intensidá física, como ye'l casu de deportistes d'altu nivel, tirando en baxo esa tracamundada idea de que los vexetarianos son xente débil. Esto son dalgunos casos de deportistes vexetarianos en disciplines de lo mas estremaes:

CARL LEWIS(atletismu): 17 medalles d'oru

EDWIN MOSES(400m. valles): 2 vegaes oru olímpicu

LEROY BURRELL(4x100): 1 oru olímpicu y 2 vegáes campeón del mundiu

MARTINA NAVRATILOVA(tenis): 167 títulos

MURRAY ROSE(natación): 4 oros olímpicos

DAVE SCOTT(triatlon): 6 vegáes Ironman

ROBERT MILLAR(ciclismu): ganador clasificación montaña Tour de Francia y 24 victories d'etapa

B.J.ARMSTRONG(baloncestu): 3 aniellos campeón NBA

MAC DANZING(artes marciales): campeón en d'elles categories y modalidaes.

BILL PEARL(culturismu): varies vegáes Mr. Universe.

Aportará un dii nel que los homes verán l'asesinatu d'un animal como agora ven el d'un home.

Leonardo da Vinci

Una investigación fecha polos científicos de la Universidá de California San Diego(UCSD) demuestró que'l consumu de carne roxa y llacteos fae medrar el riesgu de cancer.

Ajit Varki, direutor de la Escuela de Medicina de la UCSD, lleva años estudiando la relación de la carne y la llechi col desendolcu de tumores, demostró que la molécula Neu5Gc, que s'encuentra en dichos productos, incorporase a los texidos humanos causando una inflamación crónica que beneficia al cancer.

Son munchos los estudios que demuestren lo perxudicial de la carne roxa. La so relación col cancer de colon yá ta más que demostrada. Utru estudiu de la Universidá d'Harvard, lleváu a cabu pol doctor Eunyoung Cho y el so equipu, con 90.000 muyeres demostró que'l consumu de carne roxa(incluyendo xata, corderu, gochu, hamburgueses, perrinos calientes, beicon y cualquier utru tipu de carne preparada) facía espoxigar un 50% les posibilidaes de tener cancer.

Científicos del Institutu Nacional del Cancer d'Estados Xuníos, espublizaron nel 2007 na revista Plús Medicine, les conclusiones del análisis de 500.000 persones ente 50 y 71 años, a les que somotieron a una dieta vixilada. Dempués d'8años, l'estudiu determinó 53.396 casos de cancer. El riesgu estadísticu yera ente el 20 y 60 por cientu de carncer d'esófagu, colorretal hepáticu y pulmonar.

Y el pescáu(eufemismu de pexe muertu) nun dexa de ser carne procesada, conxelada, qu'acumula metilmercuriu y metales pesados que van acumulandose nel cuerpu.

Un artículu espublizau nel British Medical Journal basase na revisión d'89 estudios(41 ensayos clínicos) nos que se suponien los beneficios de les grases omega 3. La conclsión algamada ye que nun ye demostrable la reduccion de casos de cancer pola inxesta de omega3.

Esti vienres pasáu apaecieron en La Peña(Blimea) los cadabres de 137 cabres, taben nun avanzau estau de descomposición, lo que quier dicir que llevaben munchu tiempu muertes. Los vecinos contaben que facia selmanes que fedía la zona polo que llamaron a la policía. Ente la montonera de cuerpos ensin vida, inda, sobrevivieron 27, aguantaron esi pasamentu ensin augua nin alimentu durante diis, entamando a comer los cadabres de les sos compañeres.

Nun tan nidies les causes de les muertes, si foi por enfermedá, por dexadez, por una mala situación económica del cabreru,...

Lo que si ta nidiio ye, que'l cabreru tien una responsabilidá innegable. Seya cual seya la causa, el yera consciente de lo que taba pasando, que nun se supiere reaicinar nun desime de responsabilidaes, nun foi dalgo qu'aportó de sopitu, desendolcose a lo llargo de selmanes y taba dispuesto a que siguieren morriendo les 27 que faltaben. Y según confesó a los presentes, enterro na redolada munchos otros cadabres, incumpliendo asina la normativa medioambiental col riesgu que supón pa la salú pública. Esto quier dicír que nun duldaba n'algamar les 300 muertes, que s'estima componíen el rebañu

Si el cabreru, polo que fuere, nun pudo alimentar a les sos cabres, tíena que ser consciente, que ente sos manes, había munches vides que, innegablemente, sintieron duelgu, llerza, fame insufrible, secañu, que morrieron nun pesamientu que nun se pue permitir.

Pudo llamar a protectores d'animales que se fixeren cargu d'elles; dexales a la entidá competente(Proygrasa, esti casu); regalales, que dexuru tarien interesaos n'elles mas d'un; soltales pol monte; cualquier camín yera meyor qu'esta masacre.

Y que nun diga que punsose nerviosu por que taba peligrando'l trabayu que da-y de comer a sos fiyos y nun supo que facer, porqu'agora yá nun lu tien, pero si tien sobre si unes cuantes muertes.

Estes son les sobrevivientes