VenerablePerru

Auré y Aurá son dos anónimos paisanos, tan anónimos que punxeron-yos esos nomes porque naide nun sabía como nomalos. Falen una llingua desconocia, otra mas dientru de la familia de les llingues tupí-guaraní, pue dicise que son los caberos falantes del so estintu pueblu. Tuvieron la mala suerte d’apaecer nel puntu de mira de daquién que nun contaba con ellos, pero si coles sos tierres.

L’Amazonía yá va tiempu qu’entamó a tener un fonderu interes pa eses tiestes pensantes con güeyos rellumantes, que dende dalgún despachu planeen tresformar esa desaprovechada viescona en dalgo con valor pa la economía. Nun ye nada nuevo, les minories marxinales nunca nun entraron nos planes de los “grandes”. Con suerte, si nun son esterminaos, tendrán una reserva, una tierra axena y llonxana onde morrer de señalda, o si son aniciaores llantar un casinu o un bingu pa turistes.

Estos pueblos indixenes representen el 7,6%(43millones) de la población de Llatinoamérica.

Un insospechau díi, una d'estes comunidaes como fixerenlo otres munches enantes, sentirarán al alborecer el ruxir de fierru que pon la final a la milenaria hestoria del so pueblu y nun chisgar, les plantaciones de caña de zucre y soya afogarán la so cultura.

La soya nun va pa les boques de esos “snobs” vexetarianos, va p’alimentar les vaques y los coches a base de biocombustibles. El remediu ye enforma mas dañín que la enfermedá. El biodiesel y el bioetanol ñacieron muertos como intentu de ser l’alternativa al petroleu, y anque nun contaminen direutamente, la escomanada deforestación que provoquen y la medra de los precios de dalgo tan básico como los cereales faen de los biocombulstibles el peor de los intentos d’iguar lo qu’estropiemos.

Pero Lula da Silva ta tou enfotáu en facer de Brasil una potencia mundial  anque seya a costa de convertir l’Amazonía una fábrica de “combustible verde” pa los EEXX.

Mientres, la Funai(Fundação Nacional do Índio), asitiará a Auré y Aurá nuna cabaña afayadiza onde puean siguir faciendo lo que siempre fixeren: fleches, anque yá nun les usen. Y finaran los sos díes como Xerónimo, enfiláu y vendiendo botones del so traxe a turistes que llueu tornaba a coser.

DefensAnimal ye una ONG (aconfesional y apolítica) asitiada en Valencia col caréu d’informar y concienciar a la sociedá de que tolos animales, humanos y non humanos, tienen drechu a vivir en llibertá.

Quier amosar lo inxusto qu’una especie, como la humana, domine, poseya y fine cruelmente coles vides de otres especies: especismu.

DefensAnimal aporfia que’l veganismu(actitú 100% vexetariana) ye’l meyor camín pa dignificar la nuesa interaición colos amás animales.

DefensAnimal y IgualdAnimal son les úniques asociaciones, que trabayen dientru del Estáu, manifiestamente abolicionistes. Esto quier decir que nun reclamen la meyora de la situación de los animales(bienestarismu), si non el so desendolcu en llibertá.

Toa esta introdución pa dicir que na páxina web de DefensAnimal, al llau de la bandera británica, china, alemaña y catalana, ta l’asturiana. Calcando n’ella pues asomar a la información na nuesa llingua. Too un detalle.

Pues comprobalo calcando equí: http://www.defensanimal.org

Aprovechando l'aniversariu...

El xoven Charles, como los mozos nobles ingleses de la dómina, dedicábense fundamentalmente a montar a caballu, dir a clas en Oxford o Cambridge y folgal enforma. Pero un aristócrata nomáu Fitzroy, al que-y encomendaren facer una esploración xeográfica, necesitaba daquién del so nivel col que charrar nel guacéu a bordo del Beagle. Asina foi como Darwin enguedeyose nun fechu científicu que xiringaria los paradigmes del momentu. Esti viaxe que duró 5 años foi, en munchos momentos, una pesadiella pa Charles Darwin, tenía maréu crónicu y en tierra padecía de problemes intestinales. Anque dir a la gueta de la verdá compensa l'esmolecimientu.

Estes son dalgunes de les sos frases:

“La clasificación de les formes, funciones organiques, vezos y dieta, demuestren d'una manera evidente que l'alimentu normal pa l'home ye vexetal como los antropoides y los simios y que los nuesos dientes caninos tan muncho menos desendolcaos que los de so. Nun tamos destinaos pa competir con besties xavaces o animales carnívoros.”

“A los animales que dicimos nuesos esclavos, nun nos presta consideralos nuesos iguales.”

Francis Darwin, falando de so pá, comento: “Les dos coses que movieron a mio pa quiciabes mas fuertemente que cualquier otra, foron la crueldá escontra los animales y la esclavitú”

Imáxenes ensin pallabres que faen falar la conciencia. Ye como si escucares tres les muries de les factories nes que se crea y destruye la vida pola gracia del dineru.

Cuando l‘home ye mas máquina que la máquina, cuando refuga’l pensamintu y el sentimientu, la so cara espeya la pesadiella.

Pitinos cuspios por gargüelos de fierru, glayios de dolor afogaos nel vacíu, plantes regaes con química, carriles, cintes tresportadores, filos d’aceru, lluz de fluorescente, movimientos crónicos. Llaceria.

“El nuesu pan de cada díi” (Unser täglich brot), ye un documental austriacu-alemán qu'amosa como l’agricultura y ganadería dexa de ser una actividá humana pa tresformane nun procesu tecnolóxicu y mecanizáu.

Esti ye’l tráiler:

Falar de nutrición ye enguedeyase nun aldarique nel que ye abegoso aportar a daqué nidio. Hai milenta formes d'atalantar alimentación: dieta disociada, del grupu sanguineu, hipocalórica, macrobiótica, mediterranea, del astronauta,...

Hestoricamente l'alimentación humana foi, y ye, un cambéu constante, nun podemos falar de la dieta tradicional. Na alimentación del homo antecesor yera un vezu atopor carne humana, tamién asocede l'antropofaxia nel casu los celtes, cosa qu'agora vemos del too aborrecible y antiñatura. Nel sieglu XIII incorporaronse a la dieta europea productos como l'arroz, la pasta, la berenxena o les especies provenientes del mercadeu na ruta la seda. Cola arribada d'América les pataques, tomates, pimientu, maiz,... Y nos años 60s la bayura total qu'inda sigue medrando.

Agora, una vegada superada la econimía de subsistencia na que too valía escontra nun morrer de fame, atopamonos con utru momentu hestóricu nel que lo que-y echamos al platu tien de ser replantegao con maxín.

De lo que comíen nuesos güelos a entamos del sieglu pasáu a lo que comemos nos anguañu hai un reblagu cuasi irreconocible, en malpenes una xeneración pasose de comer pitu tres vegaes al añu y usar el chorizu con cueta gotes pa dar sabor a los cocios, a los 57,8 quilos de carne que por media consumese nel Estáu. Según l'INE, el consumidor mediu come 14,7kg de pescáu, 122kg de llácteos(54,8 de llechi, 16,6 de yogures,...), 52,4kg de pan, 92,1kg de verdures, 77,7kg de frutes, 55,1kg d'augua mineral, 35,6kg de bebides gaseoses, 17,5kg de cerveza y 12,7kg de vinu,.... El camín de la fartura.

Esisten abondes formes d'alimentase, pero una de nutrirse.

N'esti puntu hai d'estremar dos pallabras que s'aveza a usar como sinónimos, pero nun lo son: nutrición y alimentación.

L'alimentación ye un fechu voluntariu, controlable, col que ciguar la fame. La nutrición ye involuntaria, un procesu fisiolóxicu col que l'organismu consigue los nutrientes que necesita. Alimentase ye un fechu social, cultural, deprendiu; nutrise ye una función corporal dixestiva na qu'incorporar los macronutientes( proteines, carbohidratos y grases) y micronutrientes( vitamines y minerales). Poro, hai de falar de bien nutriu, non de bien alimentáu.

Atalantao esto ye cuando hai que matar al cocineru. Dexar de comer colos sentios pa comer cola tiesta, refugar lo esótico, les delicatessen, lo sofisticao; pa escoyer alimentos básicos, orgánicos, nutritivos. Ferran Adrià vs Santi Santamaria. Nin un nin otru, pulgar pa baxo a los dos: ¡yugula!. Ningun de los dos empobina la so cocina a la esencia nutricional.

Comer razonadamente nun tien porque ser dalgo monotono, nin insulso. Entra en xuegu la satisfación de facer les coses bien, ensin dexate llevar pol infanatilismu de los anuncios, nin la colocacion estratéxica de los productos nel supermercáu. Saber lo que tienes que comer, lo que-y sienta bien al to cuerpu, lo que ye mas caltenible medioambientalmente, lo que contribuye a la meyora de les persones que creen el productu. Un alimentu proviniente de la propia Asturies va ser muncho mas ecolóxicu que unu veniu del utru llau del mundiu, anque pasare tolos test de ecoloxía. Y el prestíu que ye consumir dalgo que nun supuso la esplotación y muerte d'un animal.

La tendencia, anguañu, va por satisfacer a un cliente que nun-y avaga enguedeyase na cocina, quier dalqué instantaneo, que nun tarde mas de 5 minutos nel microondes, platos precocinaos, conxelaos: caldiar y llisto. Con omega 3, calciu,... Platos que t'aporten too lo que necesites, que faente feliz, nun necesites pensar, Nestlé lo fai por ti. Transxénicos, hibridos de trigu y xen de merucu pa curate l'alopecia. Nun tienes porque perder el tiempu sabiendo d'onde vienen les coses, porque les grandes corporaciones saben lo que necesites y dantelo, tu nada mas tienes que pensar en pasar la tarxetina.

Dalgo furrula mal cuando nel mundiu 1000 millones de persones tienen sobrepesu y otros 1000 millones pasen fame.

Nun me presta'l nihilismu: nun podemos facer nada, les coses son asina y son horribles. Nin ser señaldosu: culquier tiempu pasáu ye meyor. Agora podemos escoyer, enantes tinin que contentase con sopa de pan y augua puerco.

Agroecolóxia. N'Asturies hai cooperatives ecolóxiques, asociaciones de consumidores responsables,... Ye querer atopales(como l'Equipu A).

Cuando crees que ye abegoso que dalgo aporte a sosprendete, siempre apaez una hestoria cola que plasmar. Esti ye’l casu de “Michelito”.

“Michelito”, Michel Lagravère, ye un nenu franco-mexicanu de 11 años que, el pasáu sábadu 24, entró nel llibru Guinness de los records al matar seyes “novillos”, tarazar dos oreyes, dar dos vueltes al ruedu y salir a recostinos de la plaza de Mérida( México).

“Michelito” lleva dende los 6 años toreando, yá toreó en Perú, Guatemala y Francia , y como diz el so pa: “enxamás nun tuvo un accidente seriu, sigue los cursos de la Escuela Taurina, ta mui curiáu y vive la so pasión, que ye tamién la de so familia”

3 ensin xacios n'1:

1.  Esplotación infantil. Nidiu exemplu de  pas que quieren enriquecese y esfrutar del ésitu del so fiu, dispuestos pa ello fasta crear una máquina de matar.

Si pa ser padre se requiriere un permisu, un carné que-ylu concedieren a xente con unes conocencies, unes actitudes y unes capacidaes, estos nunca nun deberien poder selo.

Hai quien tracamunda muncho les coses y aporta a decir coses asina:”tanto o mas peligroso que participar nuna”becerrada” ye, pa un menor, esquiar o xugar al rugby, y non por eso cohibense eses practiques”

Los funcionarios de la Fiscalía pa la defensa del menor y la familia nun vieron ningún problema n'esti fechu.

2.  Tortura y asesinatu animal. Baxo la escusa de la tradición y “l’arte”, xustificase un espeutáculu violentu, sádicu, sangrientu, cruel… ,que espeya una sociedá reprimida que nun ye a posicionase a les clares encontra d’una inxusticia tan escomanada que, en realidá, nada mas interesa a una minoria retrogada.

3.   Siempre xugando colos vacios llegales, les ambigüedaes. Nun algamo a atalantar por qué paises, supuestamente progresistes como Francia, nun son a finar con espeutáculos tan enfermizos.

El nenu prodixu:

Yá entomó la VI edición d'esti retrógadu actu que tien llugar na vecina Galicia ente'l 10 y el 24 de xineru.

El sen d'esti “campeonatu” ye que garapiellos d'estos “deportistes amantes de la ñatura” asitiaos peles provincies de Galicia maten el mayor númberu posible de raposos, p'asina, facese col tan naguáu premiu de ganadores. Toa esta diversión pol increible preciu de 30 euros cena incluia.

Esti fechu tien l'honor de ser el caberu de les sos carauterístiques nel mundiu dende la so prohibición, nun va muncho, n'Inglaterra y Gales.

La cacia del raposu desendolcase gracies a la financiación pública que pon la conceyeria de cultura y deportes(dirixia pol BNG) y la conseyeria de mediu ambiente( en manes del PSOE). Paez qu'estos dos partios políticos comparten l'afición al asesinatu por deporte(actividá cinexetica, eufemismu) demostráu por Fraga durante tantu tiempu. Y nun ye un fechu aislláu una vegada al añu, tamién, en Galicia, yá que ye refugáu pol restu del estáu, amosase´l campeonatu “estatal”, “gallegu” y “provincial”.

Pue xustificase too, fasta l'actividá mas enfermiza. Estos sádicos con butiellos abultaos tiren del argumentu de preservar l'equilibriu, yá que, según ellos, la densidá de raposos ye mayor a la encamentada. Epero que nun se crea naide esta probe esplicación, ta nidio que detrás hai intereses económicos, políticos y otros mas fonderos.

La cabera pallabra pa torgar esti ensin xacíu tienla la fiscalia de mediu ambiente. De toes menes hai un bon garapiellu d'asociaciones convocaes p'amarga-yos la xornada como yá fixieren l'añu pasáu.

Pero quedariame xurtiu si nada mas me quedare equí y nun falare de la gran inxusticia que se fae a diariu. Cualquiera pue identificase con un actu tan gratuitu como la cacia del raposu, pero muncho mas destructivu que la escopeta ye'l tenedor y cuchiellu col que, ca díi, tarazase´l cuerpu d'un animal que nun tuvo la escasa suerte de, polo menos, correr en llibertá.

Otra recetina cenciella: flan puramente vexetal, ensin llechi nin güevu. Ensin necesidá d'usar ingredientes d'orixe animal con tolo que supón.

Como s'aveza a dicir n'estos casos: rica y nutritiva, encamentada pa tolos miembros de la familia.

INGREDIENTES:

• ½ taza de zucre integral

• ½ taza de zucre en polvu( a poder ser, sinon con otra ½ taza de zucre integral el resultau ye asemeyáu)

• 400g de llechi de cocu

• 1 taza y ¾ de llechi d'avena

• 3 cuyaraes de ocle agar-agar(l'agar pue ser en polvu o desecada, la primera cunde mas polo qu'hai qu'echa-y menos, la segunda ye mas barata y con tarazalo en cachinos val. Yo avezo a mercar la desecada)

• 1 cuyarada sopera d'augua

CACÍA NECESARIA

• Un cazu pequeñu pa fundir el zucre

• Cazu medianu pa entemecer los ingredientes

• Molde de flan

• Cuyar de maera pa revolver

PASOS

1. Echar el zucre integral nel cazu pequeñu y remover fasta que se derrita. Una vegada el zucre tea llíquido, coyemos el molde y añademos-y la cuyarada d'augua y, darréu, el zucre.

2. Nel utru cazu entemecemos la llechi d'avena, llechi de cocu, zucre en

3. Cuando la cuyar sal ensin cochinos d'agar quier dicir que yá ta fundio y aportó'l momentu de quitar el cazu del fueu.

4. Remover pa enfriar la crema. Podemos pasala a utru recipiente pa que asina enfrie mas rapido. Cuando tea mas denso vertir nel molde.

5. Metelo na nevera y esperar qu'enfrie del too.

Hai ufanos ganaderos enfocicaos retolicando de los ecoloxistes, tratandolos de señorinos d'urbanización, como si nada mas ellos fueren los autorizaos pa tratar de los temes del monte, cuál busgosos. Ye como si nada mas dexaren falar a los políticos de política o los futbolistes de fútbol. Paezme una actitú peraltanera, como si quixeren facer de la situación dalgo insolucionable. Anque nun tendrien de selo, yá qu'esos pih.os de ciudá son los que ponen les subvenciones y van a dexar euros ellí los domingos.

Inda nun atalanto que tien de malo la propuesta d'etos ecoloxistes cangueses d'Azor. Qu'heba un perru pastor curiando del ganáu ye una midida coherente y tradicional. Abultame que lo que-y prestaría a los ganaderos ye que-yos punxere'l Princiau un guardia con una metrayeta en ca rebañu. Igual esto aplaudirinlo.

El problema hai que miralu con amplitú. Les estadistiques dicen que los rebaños afeutaos por ataques de llobos ye de menos de 2%, nel 2.006 foron afeutaes 17 de 1.138, l'1'5%. Una cifra que ta llonxe d'esmolecer.

Si siguimos afondando nel asuntu vemos que la edá de los ganaderos medra a esgaya, esto implica un mayor tiempu del ganáu nel monte col amenorgamientu de la vixilancia qu'esto supón.

Y tampoco defiendo esi caprichu colos mastines y menos que tengan de ser de raza. Un perru que se crie col rebañu bien val pa espantar a llobu que ye de lo que se trata.

N'esti llobu vs ganaderu, la mio posición como veganu( vexetarianu puru) ye la de tar nel llau del llobu. Por tradicional que seya(esto ye relativo), la ganaderia ye dalgo qu'anguañu nun ye necesaria. Ye por definición ineficiente y insosntenible, amas de suponer el xenocidiu sistemáticu, cínicu y cruel de millones d'animales non humanos.

El ser humanu pue vivir(en meyores circunstancies) con una dieta basada en cereales, llegumes, verdures, semilles y frutes.

Na mio mente, la vida d'un corderu nun ye menos preciada que la d'un humanu. Taré indispuestu a tomar la vida d'un corderu por el bien del cuerpu humanu.

Yo soi un ferviente seguidor del vexetarianismu por principiu. Mas que nada por razones morales y étiques, yo creo firmemente qu'un orden de vida vexetariano, simplemente polos eféutos físicos, influirá sobre'l temperamentu del home d'una mena tal que meyoraría en muncho'l destín de la humanidá.